Une gare a fuarce di “like” (e no dome), pensade par dissegnadôrs e dissegnadoris, zovins e mancul zovins. Si clame «Il Signôr dai Anei di piturâ» e al è il concors a gratis di dissen proponût de Aulùs, viert a partecipants di dutis lis etâts, no dome dal Friûl, ma di dute Italie.
Il teme al è leât al «Signôr dai Anei»la opare mestre di J.R.R. Tolkien, che po al à ispirât une vore di peliculis (par esempli la trilogjie di Peter Jackson, che Aulùs e je daûr a dopleâ par furlan) e la risinte serie TV I anei dal podê, su Amazon Prime.
Il concors al è organizât cul patrocini de ARLeF (Agjenzie Regjonâl pe Lenghe Furlane) e cul supuart de Societât Tolkieniane Taliane (Società Tolkieniana Italiana) e de Librerie «Tarantola» di Udin.
Par ducj i detais al è ben butâ un voli al regolament dal concors. Ai partecipants al è ancje domandât di compilâ un modul di iscrizion.
• Regolament dal concors (PDF)
Inzornament: a diference di ce c'al è scrit tal regolament, le consegne ultime dai dissens e je spostade a domenie ai 20 di Novembar. Lis votazions on-line e tacaran di lunis ai 21 di Novembar, fintremai a domenie ai 27.
Note: il regolament (art. 12) e il modul di iscrizione e son stâts cambiâts ai 18 di Otubar 2022.
Cemût funzionial il concors di dissen?
Fasint une sintesi dal regolament, ai partecipants al ven domandât di preparâ une lôr interpretazion grafiche di cualchi episodi, personaç, sene dal «Signôr dai Anei». Un al pues ispirâsi al libri di Tolkien, o ae trilogjie di Peter Jackson, o ae serie TV «I Anei dal Podê». Par preparâ lis ilustrazions – e mandâlis ae Aulùs APS – al è timp di vinars ai 14 di Otubar a domenie ai 20 di Novembar.
Po dopo dutis lis ilustrazions a vignaran publicadis su la pagjine Facebook e sul profîl Instagram «Il Signôr dai Anei», par fâ scomençâ la gare a fuarce di "like"; cui che al varâ plui "like" pal 20 di Novembar al vinçarà la gare. O ben: une part de gare. Al è, di fat, un altri premi decidût di une jurie, sielzude de Aulùs APS.
Ce si puedial vinci?
Libris e bogns par libris, prodots de cusine furlane e la bielonone clavute USB "Aulùs" (cuntune biele sorprese dentri), plui un curiôs ogjet artesanâl leât al «Signôr dai Anei» di Tolkien. Dutis chestis robis a formaran ben cuatri premis. I partecipants, che daûr de lôr divignince a saran dividûts intes dôs categoriis "Friûl" e "Italie", a podaran puartâ a cjase doi premis pai vincidôrs dal concors on-line (un pe categorie "Friûl" e un pe categorie "Italie") e altris doi decidûts de jurie, pes stessis categoriis.
E lis ilustrazions?
Ancje cui che nol vinçarâ al podarâ viodi il sô disen publicât su «Contee furlane» o sui profii social Il Signôr dai Anei, o ben su cualchi altri gadget o publicazion de Aulùs APS. Ae fin dal concors (e in mût indipendent dai risultâts), lis ilustrazions a podaran di fat jessi dopradis de associazion Aulùs, metint il non dal autôr.
Foto di viartidure dal articul: Ludovica Molinaro, La compagnie di Aulùs, 2021
