Tacant di vinars ai 12 fin a domenie ai 14 di Setembar 2025 intai Zardins publics di Gurize (tra Cors Verdi e vie Cadorna), Capitâl europeane de Culture 2025, si davuelzarà la 28e edizion di Hobbiton, la fieste pai amants de Tiere di Mieç inmaneade de bande de Societât Tolkieniane Taliane.
Ancje i zovins di Aulùs a saran presints a Hobbiton 2025, cuntun stand dulà che si podaran cognossi lis ativitâts de associazion e metisi d’acuardi par organizâ insiemi cualchi serade a teme tolkienian.
Ma la sorprese e sarà che a Hobbiton si podarâ provâ a dopleâ “Il Signôr dai Anei” par furlan graciis al laboratori di Aulùs: si podarâ ufrî la vôs a Aragorn o a Frodo, a Gimli o a Galadriel, a Gandalf o a Legolas. Dut, claramentri, in marilenghe. Il laboratori al sarà sabide ai 13 di Setembar, des 17 aes 19.
