Al è in distribuzion ai socis de Aulùs APS il secont numar di Contee Furlane - Lis gnovis di Aulùs, la riviste anuâl de associazion, publicade in version bilengâl par Talian e par Furlan.

Ce si cjatial su Contee Furlane?

Chê dal 2023 e je une edizion che intes sôs 16 pagjinis e presente sei le vite de associazion, che aprofondiments interessants e bielis storiis. A ufrî la lôr “pene”, ve cualchi prestigjose firme dal mont furlan e tolkienian. Daspò dal articul di viertidure di Francesco Spizzamiglio, president de Aulùs APS, a seguissin articui di pre Daniele Antonello (diretôr dal setemanâl “La Vite Cattoliche” e di “Radio Spazio”), Paolo Paron (president onorari de Societât Tolkieniane Taliane), Michele Calligaris (dal sportel regjonâl pe lenghe furlane) e Gianluca Comastri, conseîr de Societât Tolkieniane Taliane e autôr di cetancj saçs su J.R.R. Tolkien.

E completin la edizion 2023 di Contee Furlane Emanuele Paravano (vice-president), Luca Baradel (segretari e tesorîr) e Edoardo Asquini (conseîr), che e contin lis ativitâts inmaneadis tal 2022, in plui che il diretôr responsabil de riviste, Giovanni Lesa. Curiose, par ultime, la interviste ae gnove taliane (anzit: o podaressin dî gnove furlane) Camila Oliveira de Souza.

Une edizion ilustrade cun prosperitât

Ma no je finide: lis pagjinis di Contee Furlane a son insioradis di tantis bielis ilustrazions che e àn partecipât al concors «Il Signôr dai Anei di piturâ», davuelt inte Sierade dal 2022, presintis ancje intal Lunari tolkienian 2023.

Cemût vê Contee furlane

Le maniere plui svelte e buine par ricevi Contee Furlane e je fâ la tessare de associazion Aulùs APS: la riviste e rivarà drete a cjase, par pueste. La iscrizion ae associazion, in plui, e da ai socis i nestris gadgets e cualchi piçule – ma interessante – oportunitât..